मावळ तालुक्यात अंमली पदार्थविरोधी कारवाई; महिला अटकेत
*मावळ तालुक्यात अंमली पदार्थविरोधी कारवाई; महिला अटकेत*
तळेगाव दाभाडे:मावळ तालुक्यात गेल्या काही दिवसांपासून अंमली पदार्थविक्री आणि साठवणुकीविरोधात पोलिसांनी मोहीम अधिक तीव्र केली आहे. त्याअंतर्गत सोमवारी तळेगाव दाभाडे पोलिस ठाण्याच्या हद्दीत पिंपरी–चिंचवड पोलिसांनी कारवाई करत एका महिलेला अटक करत तिच्या ताब्यातील गांजा आणि इतर मुद्देमाल जप्त केला.
सोमवारी (दि. ८) तळेगाव दाभाडे पोलिस स्टेशनच्या हद्दीत म.रा.वि.क. मर्यादित, सोमाटणे शाखा उपकेंद्र, पेनिन्सुला लँड लिमिटेड परिसरात ही कारवाई करण्यात आली. याबाबत पोलिस हवालदार किशोर विठ्ठल परदेशी यांनी फिर्याद नोंदवली आहे. त्यानुसार संबंधित महिला आरोपीवर एन.डी.पी.एस. कायद्याच्या कलम ८(क), २०(ब)(ii)(अ) प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी महिलेच्या ताब्यात एकूण ₹३५,६०० किमतीचा मुद्देमाल जप्त करण्यात आला. त्यामध्ये ६०० ग्रॅम गांजा आणि इतर साहित्याचा समावेश असून ते ती अवैध विक्रीसाठी बाळगत असल्याचे तपासात स्पष्ट झाले.
