ज्ञानेश्वर महाराज थोरल्या पादुका मंदिरात अखंड हरिनाम सप्ताहाचे आयोजन
आळंदी : येथील श्री संत ज्ञानेश्वर महाराज थोरल्या पादुका मंदिरात श्रीसंत ज्ञानेश्वर महाराज व श्री विठ्ठल रुक्मिणी मूर्ती प्राणप्रतिष्ठापना वर्धापन दिन आणि श्री संत निवृत्तीनाथ महाराज त्र्यंबकेश्वर यात्रा उत्सवा निमित्त अखंड हरीनाम सप्ताह, गाथा भजन व श्री ग्रंथराज ज्ञानेश्वरी पारायण सोहळ्याचे आयोजन करण्यात आले आहे. अशी माहिती ट्रस्टचे संस्थापक अध्यक्ष अँड. विष्णू तापकीर, खजिनदार दत्तात्रय गायकवाड यांनी दिली.
पुणे – आळंदी पालखी मार्गावरील वडमुखवाडी येथील श्री संत ज्ञानेश्वर महाराज थोरल्या पादुका मंदिरात १४ जानेवारी ते २३ जानेवारी २०२५ या कालावधीत विविध धार्मिक कार्यक्रमांचे आयोजन करण्यात आले आहे. या सोहळ्याचा प्रारंभ १४ जानेवारीला होत आहे. या निमित्त विना पूजन, कलश पूजन, ग्रंथ पूजन शांतीब्रम्ह ह. भ. प. मारोती महाराज कुरेकर व डॉ. नारायण महाराज जाधव यांचे हस्ते होणार आहे. या वेळी सोहळयात श्रींची महापूजा, काकड आरती, श्री ज्ञानेश्वरी पारायण, गाथा पारायण, महिला भजनी मंडळांची भजन सेवा, हरिपाठ, हरी कीर्तन व हरी जागर असे विविध धार्मिक कार्यक्रम होणार आहेत.
या शिवाय मान्यवर कीर्तनकार यांची कीर्तन सेवा दररोज संध्याकाळी सात ते नऊ या वेळेत होणार आहे. एकादशी दिनी ह. भ. प. तुकाराम महाराज ताजणे यांचे कीर्तन होत आहे. सप्ताहात विश्वनाथ महाराज मस्के, संतोष महाराज काळोखे, नारायण महाराज काळे, अच्युत महाराज डोंगरे, रोहित महाराज पांचाळ, भीमराव महाराज शास्त्री, हरिदास महाराज शास्त्री, ज्ञानेश्वर माउली करंजीकर यांची कीर्तन सेवा होत आहे. शुक्रवारी ( दि. २३ ) रोजी सकाळी दहा ते बारा या दरम्यान गोविंद महाराज गोरे यांचे काल्याचे कीर्तनाने सोहळ्याची सांगता होणार आहे. या वेळी कीर्तनकर, प्रवचनकार, भाविक, नागरिक, महिला भजनी मंडळाने उपस्थित राहावे असे आवाहन अँड. तापकीर यांनी केले आहे.
सप्ताहात दैनंदीन पहाटे महापूजा व काकडा आरती, ज्ञानेश्वरी पारायण, गाथा भजन, महिला भजनी मंडळांची भजन सेवा, हरिपाठ, कीर्तन, महाप्रसाद, हरीजागर असे कार्यक्रम होणार आहे. या सप्ताहाची सांगता काल्याच्या कीर्तनाने होईल. त्यानंतर महाप्रसादाचे वाटप होणार आहे. तत्पूर्वी दिंडी मिरवणूक होणार आहे. या धार्मिक कार्यक्रमास भाविक, नागरिकांनी उपस्थित राहून महाप्रसादाचा लाभ घ्यावा. असे आवाहन ट्रस्टचे अध्यक्ष अँड.विष्णू तापकीर, खजिनदार दत्तात्रय गायकवाड यांनी केले आहे.
