देहूरोड येथे आशियाई सवात स्पर्धेसाठी निवड झालेल्या खेळाडूंचा सन्मान
देहूरोड : अम्युच्युर सवात असोसिएशन महाराष्ट्र राज्य यांच्या वतीने नेपाळ येथे होणाऱ्या आशियाई व इंटरनॅशनल सवात स्पर्धेसाठी भारतीय सवात संघात निवड झालेल्या 24 खेळाडूंसाठी आज देहूरोड येथे विशेष सत्कार समारंभाचे आयोजन करण्यात आले. या कार्यक्रमात निवड झालेल्या सर्व खेळाडूंना नियुक्तीपत्र प्रदान करण्यात आले तसेच त्यांचा गौरव करून सन्मान करण्यात आला.
सदर कार्यक्रमात उपस्थित मान्यवरांनी खेळाडूंना आगामी आंतरराष्ट्रीय स्पर्धेसाठी शुभेच्छा दिल्या. खेळाडूंनी आपल्या उत्कृष्ट कामगिरीच्या जोरावर भारताचे नाव जागतिक पातळीवर उज्ज्वल करावे, अशी अपेक्षा व्यक्त करण्यात आली. यावेळी सवात सारख्या पारंपरिक आणि कौशल्यपूर्ण खेळांना प्रोत्साहन देणे ही काळाची गरज असल्याचेही मान्यवरांनी नमूद केले.
सवात हा फ्रान्समध्ये उदयास आलेला एक पारंपरिक मार्शल आर्ट असून त्याला “फ्रेंच बॉक्सिंग” म्हणूनही ओळखले जाते. या खेळामध्ये हातांच्या पंचेसबरोबरच पायांच्या अचूक आणि प्रभावी किक्सचा वापर केला जातो. विशेष म्हणजे सवाते खेळताना खेळाडू शूज परिधान करून खेळतात, जे इतर मार्शल आर्ट्सपेक्षा वेगळे वैशिष्ट्य आहे. सवात खेळामुळे शरीराची तंदुरुस्ती, चपळता, संतुलन आणि आत्मसंरक्षण कौशल्ये विकसित होण्यास मोठी मदत होते.
या कार्यक्रमाला सवात असोसिएशन महाराष्ट्राचे सचिव व भारतीय सवात महासंघाचे कोच सुहास धाईंजे, साताराचे सचिव सुशांत पोळ, पिंपरी चिंचवडचे सचिव विशाल तरस, सहसचिव राहुल पवार, रायगडचे सचिव भूपेंद्र गायकवाड, राष्ट्रीय पंच अभिजीत हरपळे तसेच धनेशा शिंगोटे, रोहित धाईंजे, समर सिंह, रोशन राठोड यांच्यासह इतर मान्यवर व पालक उपस्थित होते.
कार्यक्रमाचे वातावरण उत्साहपूर्ण आणि प्रेरणादायी होते. या सन्मानामुळे खेळाडूंमध्ये नवचैतन्य निर्माण झाले असून आगामी स्पर्धेत उत्कृष्ट कामगिरी करण्याचा त्यांचा आत्मविश्वास अधिक दृढ झाला आहे.
