दारूच्या नशेत शिवीगाळ केल्यामुळे मित्रानेच केली मित्राची हत्या
लोणावळा :
मावळ तालुक्यातील ठाकूरसाई येथे कुबेर व्हिला बंगल्याच्या माळी रूममध्ये दारूच्या नशेत मित्राला आईवरून अश्लील शिवीगाळ केल्याच्या रागातून मित्राने शिवीगाळ करणाऱ्या मित्राचा लोखंडी कुदळीने डोक्यात घाव घालून खून केल्याची धक्कादायक घटना घडली आहे. या प्रकरणी लोणावळा ग्रामीण पोलीस ठाण्यात खुनाचा गुन्हा दाखल करण्यात आला आहे.
दिनेश लक्ष्मण गरवड (वय ३६, रा. भाजे, ता. मावळ) असे खून झालेल्या तरुणाचे नाव असून, फिर्यादी ज्ञानेश्वर लक्ष्मण गरवड (वय ४०, रा. भाजे) यांनी दिलेल्या माहितीनुसार, प्रणव विश्वजित डेका (वय १८ वर्ष, रा. चव्हाण नगर, वडगाव मावळ) याच्या विरोधात गुन्हा दाखल करण्यात आला असून त्याला पोलिसांच्या ताब्यात घेतले आहे.
३ जुलै २०२५ रोजी रात्री १२. ३० वा. च्या सुमारास कुबेर व्हिला, ठाकूरसाई येथील बंगल्यातील माळी रूममध्ये ही घटना घडली. आरोपी व मयत दोघेही त्या बंगल्यात माळीकाम करत होते. दरम्यान, दारूच्या नशेत मयत दिनेश गरवड याने आरोपी प्रणव डेका याला आईबाबत अश्लील शिवीगाळ केल्याचा राग मनात धरून प्रणवने लोखंडी कुदळीने दिनेशच्या डोक्यावर वार केला. यात गंभीर जखमी झाल्याने त्याचा जागीच मृत्यू झाला.
घटनेची माहिती समजताच पोलिसांनी घटनास्थळी धाव घेतली असून, प्राथमिक तपासात आरोपी प्रणव डेका याला अटक करण्यात आली असून, घटनास्थळाचा पंचनामा सुरू आहे. या घटनेचा तपास पोलीस निरीक्षक दिनेश तायडे यांच्या मार्गदर्शनाखाली सहायक पोलीस निरीक्षक प्रशांत आवारे हे करत आहे.
