तळेगाव एमआयडीसी पोलीस स्टेशनमध्ये भव्य उत्साहात रक्षाबंधन सण साजरा
मावळ :
भारतीय संस्कृतीत सण-उत्सवांना विशेष महत्त्व आहे. हे सण कुटुंबातील सर्व सदस्य एकत्र येऊन, प्रेम व आनंदाने साजरे करतात. मात्र, हे सगळं सुरळीत आणि सुरक्षित होण्यासाठी आपल्या पोलीस बांधवांचे योगदान फार मोठे असते.कर्तव्यावर सतर्क असताना सर्वच पोलीस बांधवांना सण साजरा करणे शक्य होत नाही,पोलीस स्टेशन हेच आपले कुटुंब मानून तळेगाव एमआयडीसी पोलीस ठाण्यात कार्यरत असलेल्या महिला पोलीस अंमलदार यांनी कर्तव्यावर हजर असलेल्या पोलीस अधिकारी व अंमलदार यांना राखी बांधून अत्यंत उत्साहात रक्षाबंधन सण साजरा केला तसेच पोलीस बांधवाच्या कृतज्ञतेची जाणीव ठेवत केअरिंग हॅण्डस् संस्थेच्या बालकांनी पोलीस अधिकाऱ्यांना राखी बांधून त्यांच्या सेवेला सलाम केला. हा कार्यक्रम तळेगाव दाभाडे एम. आय. डी. सी. पोलीस स्टेशन येथे मोठ्या उत्साहात पार पडला.
या वेळी तळेगाव एम. आय. डी. सी. पोलीस स्टेशनचे पोलीस निरीक्षक रणजीत जाधव आणि पोउपनिरिक्षक कांबळे, पोलीस उपनिरीक्षक खरात, उपनिरीक्षक चासकर ,तसेच परशुराम जाधव,राजू दांगट,दत्ता कोळेकर,आसिफ सय्यद,सिध्दु पवार,दिपाली कुंभार,प्रांजल बंडवाल,अंकिता सोळसे आदी पोलीस अंमलदार उपस्थित होते.
बालकांनी प्रेमाने राखी बांधत त्यांच्या सुरक्षिततेसाठी सदैव सज्ज असणाऱ्या पोलिसांचे आभार मानले.
हा उपक्रम फक्त एक औपचारिकता नव्हे, तर समाजातील रक्षकांप्रती प्रेम, आदर आणि आपुलकी व्यक्त करणारा भावनिक क्षण ठरला. पोलिस बांधवांनीही या निरागस प्रेमाला भरभरून प्रतिसाद दिला आणि अशा सामाजिक उपक्रमांची गरज अधोरेखित केली.
