ड्रग्जच्या विळख्यावर वडगाव पोलिसांचा धडाकेबाज धावता बाण: पोलिस निरीक्षक शंकर पाटील ॲक्शन मोडवर
वडगाव मावळ : मावळ तालुक्याच्या मातीला पोखरणाऱ्या अमली पदार्थांच्या काळ्या सावटावर आता वडगाव पोलिसांनी कडक कारवाईचा कडेलोट करण्याचा निर्धार केला आहे. वाढत्या ड्रग्ज साखळीला खिंडार पाडण्यासाठी पोलीस निरीक्षक शंकर पाटील यांनी थेट जनतेलाच अलर्ट यंत्रणा बनवण्याचा अभिनव फंडा राबवला आहे. एम.डी. पावडर (मेफेड्रॉन) किंवा गांजाची विक्री कुठे दिसली, तर क्षणाचाही विलंब न करता मला फोन किंवा मेसेज करा, असा थेट, ठाम आणि निर्भीड संदेश त्यांनी दिला आहे.
मावळ तालुक्यात अलीकडे अमली पदार्थांचा फैलाव चिंताजनक उंचीवर पोहोचला असून, एम.डी..गांजा च्या जाळ्याने गावोगाव पाय पसरल्याच्या चर्चा रंगू लागल्या आहेत. तरुणाईला व्यसनाच्या दलदलीत खेचणाऱ्या या घातक प्रवाहामुळे सामाजिक आरोग्यावर गडद छाया पसरत आहे. स्थानिक माध्यमांनी यापूर्वीच या संकटाचा पर्दाफाश केला होता, तर आमदार सुनील शेळके यांनी आढावा बैठकीत संतप्त सूर लावत प्रशासनाला लोखंडी हाताने कारवाईचे आदेश दिले होते.
याच पार्श्वभूमीवर ड्रग्जमुक्त मावळ हा ध्येयवेडा संकल्प पुढे ठेवत पोलिसांनी मोहीम उभारली आहे. वडगाव शहरासह संपूर्ण पोलीस हद्दीत जनजागृतीची झंकार, गुप्त माहितीचे जाळे आणि तत्काळ धडक कारवाई या त्रिसूत्रीवर पोलिसांचा भर राहणार आहे. हा लढा फक्त पोलिसांचा नाही; समाजाने खांद्याला खांदा लावला, तरच ड्रग्जचा नायनाट शक्य आहे,असे स्पष्ट करत पोलिस निरीक्षक शंकर पाटील यांनी नागरिकांना सक्रिय सहभागाचे आवाहन केले.
विशेष बाब म्हणजे, माहिती देणाऱ्यांची ओळख लोखंडी कुलूपात सुरक्षित ठेवली जाईल, अशी हमी पोलिसांनी दिली आहे. त्यामुळे भीतीच्या बेड्या झुगारून पुढे या, असा संदेश दिला जात आहे. ड्रग्ज विक्रेते असोत किंवा खरेदीदार दोघांनाही कायद्याच्या कचाट्यात ओढले जाईल, असा इशाराही देण्यात आला आहे.
मावळमध्ये वाढती व्यसनाधीनता आणि त्यातून डोके वर काढणारी गुन्हेगारी पाहता, ही मोहीम टर्निंग पॉइंट ठरणार का, याकडे सर्वांचे लक्ष लागले आहे. आता जनतेचा प्रतिसादच या निर्णायक लढ्याचे यश ठरवणार आहे.
