“इंद्रायणी महाविद्यालयात डॉ. बाबासाहेब आंबेडकर जयंतीचा प्रेरणादायी सोहळा; ‘शिका, संघटित व्हा, संघर्ष करा’ चा घुमला संदेश”
तळेगाव दाभाडे:
इंद्रायणी महाविद्यालयात भारतरत्न डॉ. बाबासाहेब आंबेडकर यांची जयंती अत्यंत उत्साह, आदर आणि प्रेरणादायी वातावरणात साजरी करण्यात आली. समता, न्याय आणि बंधुता या मूल्यांचा जागर करत विद्यार्थ्यांमध्ये सामाजिक जाणीव निर्माण करण्याचा प्रभावी प्रयत्न या कार्यक्रमातून करण्यात आला.
कार्यक्रमाला महाविद्यालयाचे प्राचार्य डॉ. संभाजी मलघे, कनिष्ठ महाविद्यालयाचे उपप्राचार्य प्रा. संदीप भोसले, प्रमुख वक्ते प्रा. अजित जगताप तसेच विभागप्रमुख, प्राध्यापक, शिक्षकेतर कर्मचारी मोठ्या संख्येने उपस्थित होते.
कार्यक्रमाची सुरुवात डॉ. बाबासाहेब आंबेडकर यांच्या प्रतिमेचे पूजन व पुष्पहार अर्पण करून करण्यात आली. यावेळी उपस्थितांनी कृतज्ञतापूर्वक अभिवादन करत त्यांच्या कार्याचा गौरव केला.
प्रास्ताविक प्रा. संदीप भोसले यांनी करताना डॉ. आंबेडकर यांच्या संघर्षमय जीवनप्रवासाचा प्रेरणादायी आढावा घेतला. त्यांनी विद्यार्थ्यांना शिक्षणाच्या माध्यमातून स्वतःची ओळख निर्माण करण्याचे आणि समाजासाठी योगदान देण्याचे आवाहन केले.
प्रमुख वक्ते प्रा. अजित जगताप यांनी आपल्या प्रभावी आणि विचारप्रवर्तक मनोगतातून डॉ. बाबासाहेब आंबेडकर यांच्या विचारांचे आजच्या युगातील महत्त्व अधोरेखित केले. त्यांनी सांगितले की, “शिका, संघटित व्हा आणि संघर्ष करा” हा संदेश केवळ घोषवाक्य नसून जीवनमार्ग आहे. सामाजिक विषमता दूर करण्यासाठी आणि न्याय्य समाज घडवण्यासाठी प्रत्येकाने सजग, सुशिक्षित आणि जबाबदार नागरिक होणे आवश्यक आहे, असे त्यांनी ठामपणे नमूद केले.
अध्यक्षीय भाषणात प्राचार्य डॉ. संभाजी मलघे यांनी डॉ. आंबेडकर यांचे कार्य ‘समाज परिवर्तनाची क्रांती’ असल्याचे सांगितले. त्यांनी विद्यार्थ्यांना केवळ पदवी मिळवण्यापुरते शिक्षण मर्यादित न ठेवता विचारशील, तर्कसंगत आणि सामाजिक भान असलेले नागरिक बनण्याचा संदेश दिला. तसेच समता, बंधुता आणि न्याय या तत्त्वांचा अंगीकार केल्यासच खऱ्या अर्थाने डॉ. आंबेडकरांना अभिवादन ठरेल, असे त्यांनी स्पष्ट केले.
कार्यक्रमाचे सूत्रसंचालन डॉ. कृष्णा मिटकर यांनी केले, तर आभार प्रदर्शन प्रा. आर. आर. डोके यांनी मानले.
