आर्मी पब्लिक स्कूल, देहूरोडमध्ये अभिनव शैक्षणिक उपक्रमांचे भव्य आयोजन
देहूरोड :
अन्ताया – स्वरभारती प्रदर्शन आणि “स्व” उद्योजकता शिखर संमेलनाने उजाळली सर्जनशीलतेची नवी दिशा
देहूरोड | आर्मी पब्लिक स्कूल, देहूरोड येथे ३ आणि ४ डिसेंबर रोजी दोन भव्य आणि उल्लेखनीय उपक्रमांचे आयोजन करण्यात आले. “अन्ताया – स्वरभारती: सेलिब्रेटिंग द साऊंड ऑफ इंडिया” हे आकर्षक प्रदर्शन आणि “स्व” – उद्योजकता शिखर संमेलन २०२५ या उपक्रमांनी शाळेच्या इतिहासात नव्या युगाची सुरुवात घडवली.
कार्यक्रमाचे उदघाटन ब्रिगेडियर आशिष कटोच, एसएम आणि आंतरराष्ट्रीय ख्यातीचे कथक नृत्यांगन, तसेच संस्कार भारती (पिंपरी-चिंचवड) चे अध्यक्ष डॉ. नंदकिशोर कापोते यांच्या हस्ते झाले. दोन्ही मान्यवरांच्या उपस्थितीने कार्यक्रमाला विशेष सांस्कृतिक व प्रेरणादायी परिमाण प्राप्त झाले.
या प्रदर्शनाचा मुख्य विषय स्वरभारती होता. भारताच्या समृद्ध स्थानिक वाद्य परंपरेचे दर्शन घडवणाऱ्या प्रतिकृती विद्यार्थ्यांनी ५ फूट ते १२० फूट उंचीपर्यंत कमालीच्या अचूकतेने तयार केल्या.
– बालवाटिका पहिली ते इयत्ता बारावी पर्यंतच्या विद्यार्थ्यांनी पर्यावरणपूरक आणि स्क्रॅप साहित्य वापरून या प्रतिकृती साकारल्या.
– प्रत्येक कलाकृतीत विद्यार्थ्यांची सखोल अभ्यासपूर्वक मांडणी, सर्जनशीलता आणि कलात्मक कौशल्य स्पष्टपणे उजळले.
भारतीय ज्ञान परंपरेच्या (आयकेएस) मूल्यांशी सुसंगत असलेले हे प्रदर्शन आधुनिक आणि पारंपरिक ज्ञानाचे सुंदर संमीलन ठरले.
या संमेलनाच्या माध्यमातून विद्यार्थ्यांना उद्योजकतेची प्रत्यक्ष अनुभूती देण्यात आली.
– शाळेकडून उपलब्ध करून देण्यात आलेल्या बीज-भांडवलाचा उपयोग करून विद्यार्थ्यांनी स्वतःची उत्पादने संकल्पित केली.
– डिझाइन, निर्मिती, पॅकेजिंग, ब्रँडिंग, विपणन आणि विक्री या संपूर्ण प्रक्रियेचा अनुभव विद्यार्थ्यांना मिळाला.
कर्मचारी वृत्तीपासून उद्योजक वृत्तीपर्यंतचा हा प्रवास विद्यार्थ्यांच्या आत्मविश्वास, नवोपक्रम आणि नेतृत्वगुणांना चालना देणारा ठरला.
या दोन्ही उपक्रमांमुळे विद्यार्थ्यांचा सर्वांगीण विकास, सर्जनशीलता, नेतृत्वगुण आणि व्यवहारज्ञान अधिक दृढ झाले.
नवीन शिक्षण धोरणाच्या (एनईपी ) उद्दिष्टांशी सुसंगत असा हा उपक्रम शाळेसाठी अभिमानाचा ठरला असून, सर्जनशील शिक्षणाच्या दिशेने टाकलेले हे एक मोलाचे पाऊल असल्याचे मत ब्रिगेडियर आशिष कटोच यांनी केले.या प्रसंगी संरक्षण विभागातील उच्च पदस्थ अधिकारी ,पालक वर्ग ,तसेच विद्यार्थी उपस्थित होते.
